Ons
weet dat die oomblik wat jy vir Jesus Christus aanneem as jou Verlosser en Saligmaker,
woon die Heilige Gees in jou en is jou liggaam ‘n tempel van die Heilige
Gees. Hierdie tempels van die Heilige
Gees moet tempels van gebed wees. Ons
moet bid dat die Here vir ons deur die Heilige Gees sal leer hoe om gedurig te bid en in Sy teenwoordigheid
te wees.
Uit
die Onse Vader gebed wat ons lees in Matt. 6:9-13, leer Jesus vir die dissipels
en vir ons hoe om te bid.
1. Die persoon van die bidder: Net kinders van God kan hierdie gebed bid,
want ons begin die gebed met “Onse Vader”. As ons glo in Jesus Christus en Hom aangeneem
het, sê Joh. 1:12 het ons die reg om te sê ons is God se kinders. As ons God se kind is, uit genade, help die
Heilige Gees ons om tot ons ABBA VADER te bid – Rom. 8:15. “Julle het die Gees ontvang wat julle tot
kinders van God maak en wat ons tot God laat roep: “ABBA” – dit beteken Vader. Die Heilige Gees lê ook behoeftes en nood op
ons harte waarvoor ons moet bid. Mnr. Overtholzer,
die stigter van Child Evangelism Fellowship het daagliks gebid vir die kinders
van die wêreld met die aardbol voor hom.
2. Wat is die doel van gebed:“Laat
U koninkryk kom, laat U wil geskied”. In Joh.
4:34 het Jesus gesê: “My voedsel is om die wil te doen van Hom wat My
gestuur het en om sy werk te voltooi.”
Wat is hierdie werk? Om die
Koninkryk uit te brei. Hoe kan ons dit
doen? Bid vir God se wil en werking deur
die Heilige Gees in ons lewens, ons gesin se lewens, gemeenskap en
verder. Hoe meer ons oorgee aan God en
ons verdiep in Sy Woord, hoe meer word God se wil, God se begeertes ons
begeertes. (Rom. 8:26-27) Hierdie begeertes bid ons dan terug na God en
vra dat Sy Koninkryk sal kom.
3. Die Voorsiening vir die bidder: Elke dag word vir ons ons daaglikse brood en krag om te werk deur ons Hemelse Vader voorsien.
Fil. 4:19 sê dat ons Vader vir ons in
oorvloed gee – Hy voorsien in ons
fisiese behoeftes, maar ook in ons geestelike behoeftes deur ons te voed
met die Brood van die Lewe. Hy voorsien
in ons emosionele behoeftes deur mense oor ons pad te stuur wie vir ons liefhet
en ons emosioneel versorg. Hy voorsien
in ons intellektuele behoeftes deurdat ons verstandelik geprikkel word deur die
Woord of deur al die inligting wat ons inneem – ons moet ook bid dat die Heer
ons sal lei na die regte inligting, bv. dat ons die regte boeke sal lees. Boeke van Spurgeon, A.w. Pink, Andrew Murray,
John MacArthur, C.S. Lewis, John Piper en Albert Mohler is aan te beveel.
4. Sondebelydenis: Ons leer in Matt. 6 dat ons moet bid dat ons
Vader ons ons sonde moet vergewe. Om na ons Hemelse Vader te kom, beteken dat
ons na ‘n Heilige God gaan – ons Skepper God wat die Hemel en die Aarde gemaak
het en dit in Sy hand hou en daaroor regeer.
Hy duld nie sonde nie en ons moet na God kom en vra dat Hy ons sonde sal
bedek met die Bloed van Jesus Christus.
Ons moet ook altyd onthou dat dit net genade is dat die Here ons ons
sonde vergewe. In Deut. 9:4-6 het die Here vir die Israeliete vertel hoe
hardkoppig hulle is en dat dit uit genade is dat Hy hul help en seën. Ons mag nooit vergifnis ligtelik opneem
nie. Daar is nie iets soos goedkoop
genade nie. In diepe afhanklikheid moet
ons kniel by die kruis en die Here Jesus Christus loof omdat Hy ons pad na God
oopgemaak het met Sy Kosbare bloed wat ‘n dure prys gevra het.
5. Die
beskerming van die bidder: Ons moet bid “lei ons nie in versoeking nie, maar verlos ons van die Bose”. Ons
aartsvyand, die Satan, kan nie vir God aanval nie, Hy is te swak daarvoor,
daarom loop hy rond soos ‘n brullende leeu om te soek wie hy kan verslind. Jesus se voorbeeld in die woestyn toe die
Satan Hom probeer versoek het, moet ook ons voorbeeld wees. Jesus het die Satan elke keer
geantwoord: “Daar staan
geskrywe....” Ons kan hom slegs oorwin
met die Swaard van die Gees – die Bybel wat deel is van ons wapenrusting
volgens Efes. 6: 10 – 19 en met die bloed van die Lam: Openb. 12:11 “Hulle het self die oorwinning
oor hom behaal danksy die bloed van die Lam en die boodskap waarvan hulle
getuig.”
6. Die
lofprysing van die bidder: Die Onse Vader gebed begin en eindig met lofprysing: “Laat U Naam geheilig word en Aan U behoort
die Koninkryk en die Krag en die Heerlikheid tot in Ewigheid.” Gebed moet in geloof gedoen word en geloof
kom tot uiting in ons LOFPRYSING. Dawid
begin bid in Ps. 13 en vra vir die Here hoe lank hy nog moet wag – dit kan die
wagkamer Psalm genoem word. Hy praat met
die Here oor die wag en die probleme as gevolg daarvan, maar dan skielik
verander die aanslag in die Psalm as hy begin dink aan die Here se troue
liefde. Vs. 6b “Oor die uitkoms wat U gee, juig my hart”! Die laaste vers in Ps. 13 is
‘n loflied: “Ek wil sing tot eer van
die Here omdat Hy aan my goed gedoen het.”
7. U en ek wat tempels is van die Heilige Gees,
moet so leef dat ons ons Heilige God kan
verheerlik in alles en veral in ons gebede.
Die
dissipels het gewag en gebid totdat die Heilige Gees uitgestort is en hulle kon
blymoedig en met groot vrymoedigheid aan almal die Evangelieboodskap verkondig
sodat duisende tot bekering gekom het.
Ons as bidders wat gevul is met die Heilige Gees omdat ons kinders van
God is deur ons geloof in Jesus Christus kan vir duisende voorbidding doen
sodat die Koninkryk uitgebrei kan word.
Begin vandag bid vir jou eie Jerusalem – familie, vriende; Samaria – jou dorp; Judea – jou land en tot die uiteindes van die Aarde. Bid dat die wêreld ge-evangeliseer sal word,
bid vir al die mense wat die Here na omgewing stuur. Bid vir die kinders van
die wêreld dat hulle tot geloof in Jesus Christus sal kom.
WENK: Skaf vir jou ‘n
gebedsjoernaal boek aan en skryf alles neer waarvoor jy voorbidding doen.
No comments:
Post a Comment