Die
Bybel sê vir ons in 2 Petrus 3:18 “Sorg liewer dat julle steeds groei in
die kennis van ons Here en Verlosser,
Jesus Christus.”
Hoe
groei ‘n mens? ‘n Baba huil as hy/sy
honger is en hul kry dan melk om te drink sodat hulle kan groei. Later kry hul vaste kos soos pap of vrugte en
groente en as hul geweeg word, word daar altyd seker gemaak ‘n baba tel gewig
op, anders is daar ‘n groot probleem. In
baie huise is daar ‘n meetstok teen die mure sodat die kinders gereeld kan kyk
hoe hulle groei en of hul mekaar verbysteek wat hul lengte aanbetref.
Die
Bybel sê ons moet groei in kennis van ons Here en Verlosser, Jesus
Christus. Hoe gebeur dit?
1. Bybel
te lees 2. Te Bid 3.Te getuig 4. Sonde
te bely 5. ‘n Evangeliese Kerk
by te woon
1. Dit is baie belangrik dat jy ‘n Bybel moet hê, en die Bybel moet glo en
jou Bybel moet lees. Die Bybel is die Woord van God waar jy
alles van God leer, alles van Jesus Christus
leer en alles van die Heilige Gees leer.
C.H. Spurgeon, ‘n bekende, Engelse
prediker het gesê: “’n Mens se Bybel moet vir jou wees soos wat ‘n akkerboom
vir ‘n eekhorinkie is –dit is sy blyplek, sy kos, sy speelplek en sy
skuilplek.”
As jy jou Bybel ken, is dit
soos kos vir jou siel. Dit help jou om
reg op te tree, maar dit help jou ook om jou te beskerm met al die raad wat jy
daarin kry. Die beloftes in die Bybel gee vir jou krag en sorg dat jy jou nie
bekommer nie, bv. Ps. 119:9 “Hoe kan ‘n jongmens ‘n skoon lewe lei? Deur
gehoorsaam te wees aan u woord.”
2. Dit
is baie belangrik dat jy bid en met
jou Hemelse Vader praat in gebed, want dit help jou ook om geestelik te
groei. As jy praat moet jy nie net met
jou wenslysie na die Here gaan nie, nee, jy moet begin deur die Here te loof
vir wie Hy is en vir alles wat Hy doen. Begin
bv. Onse Vader ek loof U omdat U ons
Skepper is, ek loof U omdat U Almagtig is en alles kan doen. Praat met God oor alles wat jou bly maak en
alles wat jou hartseer maak en doen dit in die Naam van Jesus en in geloof dat
die Here jou gebede sal antwoord soos wat Hy die beste weet. Dawid bid ‘n
pragtige gebed in Ps. 23 waar Hy sê: “Die Here is my herder; daar is niks wat
my ontbreek nie. Hy laat my rus in groen weivelde; na water wat verfris, lei Hy
my. Hy gee my nuwe krag. Hy lei my op
die pad van geregtigheid tot eer van sy Naam.”
3. As
jy gereeld jou Bybel lees en gereeld tot God bid deur Jesus en gereeld beleef
hoe God vir jou help en jou gebede beantwoord, moet jy ook in die derde plek
vir ander mense daarvan vertel. Jou getuienis
kan vir ander mense help om ook by Jesus uit te kom. As die Here vir jou gehelp het toe jy problem
gehad het, kan jy dit gerus vir jou maats vertel. As jou maats vloek of dinge doen wat nie reg
is nie, vra dat die Here vir jou krag moet gee om te getuig en vertel vir hulle
dat hulle nie reg optree nie.
4. In
die 4de plek is dit belangrik om jou sonde
te bely. As jy ‘n kind van die Here
is, wil dit nie sê dat jy volmaak is nie.
Omdat ons op aarde is en geredde sondaars is, kan jy terugval in sonde
en dinge doen of sê of dink waarmee jy God hartseer maak. As ‘n skaap in modder val, kan hy nie gou
genoeg daaruit kom en probeer skoon kom nie, maar ‘n vark wat in modder val,
geniet dit en rol rond daarin. So is dit
met ‘n gelowige mens, as jy weer in sonde val, wil jy so gou as moontlik
daaruit kom en weer skoon kom.
5. Die
vyfde punt om geestelik te groei, is om saam
met gelowiges wat in Jesus Christus glo en Hom aanbid, kerktoe te gaan of Sondagskool toe te gaan waar jy meer
kan leer van die Here. Ander gelowiges
se manier van die Here aanbid, help vir jou om te groei en nader aan die Here
te kom. Dink maar aan ‘n kool vuur wat
uit die vuur val en eenkant lê. Hy gaan
dood en raak yskoud. Jy kan ook afkoel
as jy op jou eie kerkhou. Soek na ‘n
kerk waar die Bybel geglo word, waar Jesus Christus as die Here en Verlosser
verkondig word en waar gelowiges mekaar liefhet en ondersteun.
Hierdie 5 punte om
geestelik te groei, kan net gebeur as jy reeds ‘n kind van God is deurdat jy in
Jesus Christus glo. Jou geloof in Jesus
Christus, maak vir jou begerig om te wees soos Jesus. Dit maak dat jy meer wil Bybel lees, meer wil
praat met jou Hemelse Vader deur gebed, meer wil getuig en vir ander mense na
Jesus wil lei, elke keer jou sonde wil bely as jy iets verkeerd doen en saam
met gelowiges kerktoe gaan.
‘n
Paar vrae:
Ken
jy vir Jesus Christus as jou Here en Verlosser?
Behoort
jy aan God se familie?
As jy kan “ja” antwoord, kan jy die Here loof en prys daarvoor en Hom
vra om jou te help om geestelik te groei. Vra ook dat die Here vir jou sal help
om ander na Hom te trek.
As jy “nee” antwoord, kan jy nou vir
die Here vra om vir jou te help om Sy kind te word. Bely jou sonde voor die Here, vra vir Hom om
in jou lewe te kom woon en vra dat die Here vir jou die begeerte sal gee om
gereeld Bybel te lees, tot God te bid deur Jesus Christus en vir ander te
vertel van Jesus.
No comments:
Post a Comment