Resepte vir die haastige en ook beginner kok en ook ‘n paar soettand resepte: 

                                      Uit Petro se kombuis!!

1.       Kerriemaalvleis, rys en slaai

Op een plaat jou kastrol met rys; ander kastrol kerrie:    Bietjie olie in kastrol en braai ui wat opgesny is.  Voeg pakkie maalvleis by (ek maak maalvleis in klein plat pakkies op dan gooi ek dit so gevries op ui.  Voeg water by en draai plaat op medium.  Voeg wortelringe, aartappelkwarte, gevriesde ertjies by en laat kook sowat 10 minute.  Voeg nog water by as dit wil aanbrand.  Voeg nou 2 eetlepels kerrie-poeier, 2 teelepels borrie, 2 eetlepels appelkooskonfyt, 2 lepels blatjang en sout by.  Kook weer so 10 minute.  Voeg nou blikkie “baked beans” by.  Roer liggies en kook verdere 10 minute. 

Bedien kerrie op rys met blatjang asook ‘n mengelslaai of piesangslaai (kerf piesangs op en meng met bietjie appelkooskonfyt en room) 

2.       Spaghetti en maalvleis met mengelslaai

Op een plaat kook jy spaghetti en ander kastrol braai 1 ui in bietjie olie.  Voeg maalvleis by en laat kook.  Voeg by diee vleismengsel sout, peper, worcestersous, blikkie uie en tamatie mengsel of tomatiepuree of albei.  Kook tot gaar.    Plaas spaghetti in vergiettes of sif en spoel  af onder warm water.  

Eet vleismengsel op spaghetti en rasper kaas bo-oor.  Eet met mengelsaai of beetslaai  

3.        Ongebakte vrugtekoek

Meng 500g. Gemengde vrugtekoekmengsel en glanskersies of dadels.  Kook 10 minute oor lae hitte en voeg 2 lepels appelkooskonfyt en 3 eetlepels margarine by.  Haal af van stoof en voeg 1 geklitste eier by en meng goed terwyl nog warm is.  Breek ‘n pak Marie beskuitjies in stukkies en voeg by vrugtemengsel.  Meng goed en druk plat in ‘n pan.  Sny blokkies en plaas in yskas om styf te word. 

4.       Sjokolade blokkies

Breek pak beskuitjies fyn en plaas in mengbak.  Gooi pak versiersuiker (500g) bo-oor en 4 eetlepels kakao poeier en 1 teelepel vanilla.  Smelt 6 eetlepels margarine en haal van stoof af – voeg 1 geklitste eier by en meng vinnig sodat eier nie stukkies maak.  Voeg by beskuitjie-mengsel en roer goed.  Druk plat in plat gesmeerde bak.  Sny blokkies en plaas in yskas. 

5.        Gebakte yoghart tert

Maak pakkie Marie beskuitjies fyn en meng met 2 eetlepels  gesmelte margarine.  Druk  plat in bak vir kors.

Meng 500g yoghart (enige geur), 1 blikkie kondensmelk en blikkie vrugte (enige soort – ek hou van appelkose) sonder die sap.  Gooi in  tertkors en bak in mikrogolfoond vir 6 min.  Plaas in yskas en geniet dit sodra dit afgekoel het. 

6.        Pannekoek-maaltyd

Maak pannekoekdeeg in ‘n beker met tuit aan sodat jy dit sommer in pan kan uitgooi.  Meng  1 ½ kop. Water,  1 ½ kop melk, ½ kop. Olie, 3 eiers, sout, 1t. Asyn.  Klits goed en voeg 2 kop. Bruismeel by.  Verhit pan met bietjie olie vir 1ste pannekoek, daarna is olie nie meer nodig.  Sodra blasies breek aan bokant van pannekoek, draai dit om en bak anderkant gaar.  Nie te warm plaat, maar ook nie te koel.

Eet vulsels by:  tuna gemeng met blaarslaai en mayonaise; gegeurde maalvleis met kaas; kaneelsuiker, appelvulsel met room of roomys. 

7.       Makrolletjies 

Kook oor medium hitte 2 kop. Suiker, ½ kop. Kakao, ½ kop. Melk, 4 eetlepels margarine.  Kook vir 5-7 min. Totdat dit groot borrels maak.  Haal van stoof af en voeg 1 t. Vanilla en  4 kop. Droë bestanddele by (bv. 3 kop. Hawermout en 1 koppie klapper, 3 kop. Hawermout en 1 kop. Rice Crispies of 3 kop. Hawermout en 1 kop. Marshmellows of 3 kop. Hawermout en 1 kop. Rosyntjies en neute by).  Skep hopies van beslag op waspapier en eet wanneer styf en koud.